早前同大家講過，疫情之下日本AV業界大受影響，甚至已經有片商到四月底之前都停拍新片，近日又有一位自稱於風俗店工作嘅女仔，喺討論區大爆近排收入大減，更加透露風俗界嘅收入以及疫情期間的措施。

呢位自稱風俗娘於日本2ch討論區上開Post抱怨，話因為疫情影響，6日內由中午12點做到夜晚12點，收入都只有25萬Yen (約HK$18000)，更加上載3月17到22日嘅工作紀錄，證明自己身份。

網民見此展開熱烈討論，有人話依家咁嘅時勢真係冇人敢去風俗店，叫佢先回老家穩陣啲；亦有人推測黃色事業中一定會遇到染上武肺嘅客人，Post主就指業界真係相當緊張，所以每日都會量度體溫，更指由於風俗娘工作嘅地方大多都通風不順，所以冇客嘅時候都會打開窗同抽氣扇等空氣流通。

Post主亦透露自己係因為想搵錢所以先由外鄉到大城市從事風俗行業，疫情之前一日要搵10萬Yen (約HK$7000) 係輕而易舉之事，甚至佢五年前就已經月入200萬Yen (約HK$14.4萬)，換言之目前收入減少超過一半。

由於行業本質就係與人有親密接觸，加上從業員及客人都不乏外國人，日本風俗界就成為感染武肺嘅高危行業，實際上新宿歌舞伎町附近就已經有十數名確診者，但源頭不明。根據《朝日新聞》報導，自疫情以來，幫襯陪酒店嘅人數已經減少三成，風俗店人數更加減半，唔少風俗店都暫停營業，連帶附近嘅餐廳、禮品店等相關行業都受影響。有媽媽生接受訪問時更指再咁搞落去，到夏天時可能成條風俗街都會消失。