上個星期，借日本風俗娘嘅網上留言同大家報導過疫情對於日本風俗界嘅影響，時隔一個星期，包括東京等7個都府縣進入「緊急狀態」，對風俗界又有咩影響？

武漢肺炎影響下，風俗業生意本來就大受影響，唔少鋪頭已經捱唔住結業，就連著名牛郎「Roland」所開嘅牛郎店「THE CLUB」都要停業止蝕。隨住緊急狀態到來，歌舞伎町嘅牛郎店「NEO」，都將旗下50名牛郎改到未進入緊急狀態嘅愛知縣分店營業，號稱「歌舞伎町超級帥哥軍團登陸名古屋」。

事實上唔單止牛郎們，由於東京疫情最為嚴重，當日本首相安倍晉三宣佈進入「緊急狀態」但冇「封城」措施後，唔少身處東京嘅普通市民都計劃離開避難，「東京脫出」一度成為網絡熱門關鍵詞。另一邊廂，其他府縣嘅居民就擔心疫情會隨住人流，從東京進一步擴散，例如上述嘅「牛郎登陸名古屋」就受到愛知縣市民強烈反對。

大阪府同樣進入緊急狀態，當地旅遊名「性」亦影響，例如大家聞名已久嘅飛田新地，管理者「飛田新地料理組合」就宣佈旗下160間「料亭」暫停營業，違者將被「除名破門」，另一「性」地，松田新地亦隨即跟隨。

你唔好見到「料理」就真係以為佢哋係餐廳，所謂「料亭」其實只係風俗店為咗逃避法規嘅說法，名義上間鋪係賣嘢食，但同時容許「服務員」與客人「自由戀愛」，所以食食下嘢食埋女都係合理合法嘅事咁解。換言之，大阪區內嘅紅燈區已經大規模地停業。

業界面臨困境，就連首相安倍晉三在4月7日嘅國會答辨時亦稱，會考慮向風俗業發放經濟補償。