撇除道德，男人去約炮嘅原因通常都好簡單，一句講哂就係生理需要，粗俗啲講就係「緊火」，再貼切啲講就係「_痕」。問題係直男約炮都要有個女仔做對象，但大家都知女性於性行為中獲得高潮嘅次數係遠比男性為少，換言之對我黎講好合理嘅「生理需要」，喺女仔身上就未必啱用，咁究竟點解女仔要去約炮呢？美國著名性學家Dr. Lehmiller嘅網站就刊登咗一篇由美國堪薩斯大學博士研究生Katie Adams嘅文章，試圖搵出「女仔約炮的原因」。

Katie Adams利用「Approach-Avoidance Motives Theory (趨向-逃避動機理論)」，再加上動機來自自身定係他人，將女生去約炮嘅原因 (動機)分成六個，包括「尋求快感」、「尋求親密感」、「確認自身吸引力」、「避免令對方失望」、「避免朋輩批評」以及「減輕負面感覺」，並邀請264名年齡介乎18-32歲嘅女大學生紀錄低佢哋五個星期嘅約炮次數及動機，假若真係約得成，又要分享下個動機有冇滿足到，以及選出當時嘅 (正面及/或負面) 情緒。

結果發現，只有半數女仔於5個星期內至少約過一次炮，當中發現最常見嘅約炮動機係「尋求快感」，而且比起其他因為原因去約炮嘅女人，佢哋事後亦會感到更多如「滿足」、「熱情」、「興奮」等正面情緒。值得一提嘅係，即使係最自戀、對約炮最興奮嘅女性，於約炮後或多或少都會感到羞恥、內疚、後悔等負面情緒，只係相比於正面情緒嘅多與少之別。特別係因為「避免朋輩批評」而去約炮嘅女仔，負面情緒比例係最高嘅。

研究嘅結論係，約炮對女性黎講，好難一言敝之話係好或不好，一切都在乎女性以咩動機去約炮，而嗰個動機又有冇於過程中被滿足。如果滿足到，即使過程中冇高潮，對女性黎講都係一個好嘅體驗。

資料來源：Lehmiller.com