早排我哋喺Facebook同大家分享咗個香港女仔嫌男朋友求婚戒指粒石唔夠大嘅故事，背後係一個所有男人都唔明嘅謎思：點解女人會覺得粒石大粒啲就代表我愛佢多啲呢？咁我應該要使幾多次去買戒指、搞婚禮呢？使得多段婚姻又係咪真係會長啲呢？根據一個外國研究，發現結婚戒指幾錢，同婚姻維持到幾耐唔單止冇關係，甚至可以話係相反添！

據美國性學家Dr.Lehmiller引述刊登於《Economic Inquiry》嘅研究結果，喺訪問咗超過3000名平均年齡34歲嘅已婚或離婚人士後，發現大部份都只會用2,000美金 (約HK$15,500) 以下黎買求婚戒指，但離婚率就係以$2,000到$4,000美金買求婚戒指嘅組別最高。同時亦發現用超過$20,000美金搞婚禮嘅人，比起用$1,000美金或以下搞婚禮嘅人更易離婚，特別係女性被訪者。換言之，喺戒指或婚禮使幾多錢，同段婚姻維持得有幾耐基本上冇關係。就算有，都似乎係越使得多越易離婚。

而背後原因可以有好多，例如於戒指及婚禮使多咗，代表結婚要承受更大財政壓力 (特別當你借錢結婚)；又或者本身有能力使多啲錢去結婚嘅人，亦有能力支付離婚嘅費用；再者就係使得多錢及少錢嘅夫婦本身嘅性格、價值觀、甚至係結婚理由不同，都可能造成以上調查結果。反正就係想話你知 (等你再話返畀啲女人知) ，粒石大粒啲，同我哋愛唔愛你、想唔想段婚姻長久係冇關係架！