今日有雜誌報導，就黎50歲、個女都已經12歲嘅周嘉玲被影到與媽媽及女兒一齊行街，大讚佢Keep得好、係凍齡美女。問題係，周嘉玲自2002年基本息影轉戰商界及照顧家庭，幕前演出少之又少，亦即係話佢最活躍嘅年代距離依家就黎廿年，唔好講年輕一代未必知佢後生有幾正，就算親眼見過嘅我哋都未必記得返。以下呢篇嘢希望就可以提醒下你啦！

要講周嘉玲有幾靚，就一定要由佢91年選港姐開始講起。當年21歲嘅佢由加拿大返黎香港入港大讀Law，期間去選港姐拎埋當年亞軍，你雖知道當年冠軍及季軍乃係郭藹明同蔡少芬，所以周嘉玲呢個亞軍係非常真材實料，而佢亦因而加入演藝圈，主要以電影作品居多，尤其以94、95兩年最為多產。

《晚9朝5》

《重慶森林》

95年更係周嘉玲嘅爆發期，一年內拍咗十部作品，當中有因為另一個原因而被記住嘅《鬼巴士》、有徐克嘅《刀》、96年亦有，亦有雲集舒淇、邱淑貞嘅《紅燈區》。特別值得一提嘅係，或者因為外貌比較成熟冶艷，周嘉玲此時不少角色都係風塵女子又或者第三者，但年僅25歲嘅佢又真係能夠掌握呢一類角色，美艷不可方物。

《刀》

96年後周嘉玲轉戰荷里活，產量亦因而大減，講真作品嘅知名度亦唔高，但就成為第一位被選中參加美國化妝品品牌Revlon廣告嘅華人。後來再次回流香港，擔任連卡佛旗下Pedder Group嘅市場營銷總監，2002年仲拍咗哥哥嘅遺作《異度空間》，之後就淡出娛樂圈，2005年與丈夫Darryl Goveas結婚，2007年生咗個女，然後就到依家啦。