有人話沖涼、搭車、踎廁同臨瞓係一個人最有創意嘅四個時刻，一啲平時點諗都諗唔掂嘅問題，喺呢啲時候突然就會諗得掂。不過原來男人仲有第五個創意時刻，就係高潮之後，英文叫呢個時刻做「Post-Nut Clarity (射精後的清醒)」。但呢種清醒又係點得出黎嘅呢？

大家睇完上面對於「Post-Nut Clarity」嘅描述，大概會覺得佢同網民口中嘅「聖人模式」非常相似。實際上「Post-Nut Clarity」與「聖人模式」一樣，都係因為高潮過後體內內分泌嘅不同所導致。

據《Men's Health》引述泌尿科醫生Michael Ingber指，當人處於前戲階段時，腦部最活躍嘅就係包含杏仁體及海馬體嘅「邊緣系統 (Limbic System)」，而邊緣系統係主管人類嘅情緒行為；而當到達高潮嘅一刻，體內就會分泌大量如安多芬、多巴胺等多種令人心情愉快嘅激素及神經傳導物——即係點解高潮係「高潮」嘅原因；而當高潮完結，體內就會改為分泌催乳素，而催乳素係會抑制多巴胺等嘅分泌，換言之你個人就會好冷靜。

據《Men's Health》估計，大家就係呢個「集中情緒 -> 極度愉悅 -> 突然冷靜」嘅變化，令個腦突然放低哂所有同性愛有關嘅一切想法，轉為去處理一直喺個腦入面困擾我哋嘅問題之上，感覺上就好似突然可以好集中解決問題咁啦。

不過Michael Ingber醫生亦話，目前學界對於Post-Nut Clarity嘅認識非常有限，以上都只係理論上嘅估計，實際上係咪咁運作都係要經過研究 (假設有人做啦下) 先可以得知……你話唔明我講咩？咁不如依家就試下用Post-Nut Clarity睇下會唔會諗得通？