自《New Yorks Post》刊文指責Pornhub使用「非自願或未成年人士色情內容謀利」後，Pornhub已於日前下架過千萬條「非認證用戶」所上傳嘅影片。不過佢哋近來又要面對新嘅麻煩，就係有40名「性販賣 (Sex-Trafickking)」受害者聯名向Pornhub母公司MindGeek提告，要求5200萬美金，即約4億港元嘅賠償。

事件嘅起因要由2016年嘅「GirlsDoPorn」案講起。GirlsDoPorn曾經係著名嘅成人片商，但於2016年就被22名曾經「出演」嘅女子控告涉嫌欺詐、違反視頻合約，及盜用影像權。據指呢22名女性事發時年齡介乎18-23歲，全部都係睇到「招募模特兒廣告後」去應徵，結果就被人呃咗去拍成人影片並公諸於世。最後GirlsDoPorn於今年一月被判敗訴，需賠償共1280萬美元。

而Pornhub之所以被告，就係因為截止今年12月12日，相關被害者嘅影片依然能夠於Pornhub、以及MindGeek旗下其他成人影片網上搵到，原訴人指即使佢哋曾經向Pornhub作出投訴，但相關影片依然冇下架，故聯合向Pornhub (MindGeek) 提告，要求5200萬美金賠償，以及MindGeek交出利用相關影片獲得嘅收入。