「被性侵」呢個字眼，絕大部份情況之下都只會用喺女性身上，因為大家都覺得男性們被性侵乃係極少數嘅個別例子，甚至仲會用「益咗你啦！」嘅心態去看待，唔單止唔係壞事，反而好似要向性侵佢嘅人講「多謝」咁。不過根據英國一個研究，原來有半數男士都曾經被性侵，絕對唔係極少數。

圖片：《Knock Knock》 via IMDB

《The Guardian》與英國福利組織「Mankind」近日進行咗一個研究，訪問咗超過1,000名18歲或以上嘅英國男性，發現當中有9%男性聲稱自己曾經被「強暴或進入性性侵」，14%男性指自己曾被逼進行性行為，21%指自己於未成年時與成年人進行性行為。《The Guardian》總結為「有一半男性曾被性侵」。

而《Time》亦曾於2014年報導一個美國研究，發現43%嘅高中或大學生曾經有過「非自願性行為」，而且當中95%人都指施暴者為女性。284名受訪者中有18%指曾被強逼進行性為，31%指曾被「言語脅逼進行性為」，26%則指曾被「非自願地引誘進行性為」。特別值得留意嘅係，有近一半人面對「非自願性行為」時，最終都係最咗，另外10%嘗試過但因各種原因唔成功，另外40%就以愛撫或親吻完事。

圖片：《Knock Knock》 via IMDB

雖然兩個研究嘅人數都不足以反映整體面貌，但亦證明咗對男人而言，並非每次性行為都係自願。而且正如把自身經歷寫成舞台劇嘅英國劇作家Patrick Sandford指，「要男性承認自己是一名性受害者，是一件非常重大的事，因為它被視為弱者的證明」更重要嘅係「男性被性侵」受到嘅關注，比起「女性被性侵」要少得多，「我唔係話男人嘅情況更差，呢個亦唔係一個比賽。任何女性都不應該被性侵，同樣亦唔應該發生於小孩或男性身上。」