作為一個男人，大家一定有經歷過晨勃——一早起身就頂住個小帳篷，嚴重起黎連尿都屙唔到——而大家對於晨勃嘅理解就係自己係咪太耐冇近女色？又或者係咪瞓覺時磨黎磨去磨出個生理反應？而根據美國性學轉家Dr. Lehmiller指，晨勃其實係瞓覺時嘅自然現象，更重要嘅係其實女仔都會有晨勃！

據Dr. Lehmiller指，人喺瞓一晚覺時會經歷大概4到5次、每次半個鐘左右嘅「快速動眼期 (REM)」，而REM除咗係最有可能發夢嘅時刻，體內嘅睪酮及催乳素分泌都會增加，同時促進勃起嘅乙醯膽鹼會增加分泌、限制血管擴張嘅去甲腎上腺素會減少分泌——簡單啲黎講就係REM時期嘅我哋，身體就已經準備好要勃起，而如果咁啱你喺呢個時段醒咗，就會成為晨勃啦。

更有趣嘅係，以上REM期間嘅身體變化並不限於男性，實際上女性身體都會有同一系列反應，換言之女性其實如果於REM期間起身，都會「(陰蒂)晨勃」，只係大家睇唔到咁解。

至於點解人體內要有個咁奇怪嘅功能？目前醫學界並冇一個定案，但其中一種解釋係透過呢一系列動作，為人體生殖機能做「自動保養」，類似久唔久撻下車咁；另一種解釋就係由於生物嘅最終目標就係繁殖，而又因為人類用咗三份一人生黎瞓覺，所以就進化出「瞓覺時都能有部份性功能」嘅機制——當然，都係未經證實嘅假說。

反而要提嘅係晨勃 (準確啲，係瞓緊覺會勃起) 乃係自然身體反應，甚至醫學界界定男性勃起障礙係心理或生理原因嘅其實一個方法，就係睇下佢有冇出現晨勃 (有就代表身體冇問題，可能係心理原因)。