以MenClub讀者平均年紀黎講，相信大部人青少年嘅時候都未有咩智能電話，大家嘅性知識唔係憑自己「研究」，就係睇《Yes!》嘅Miss Sex學返黎。不過隨住科技發達，青少年接觸網上成人內容就變得越黎越易、年紀亦越黎越細。根據香港性教育、研究及治療專業協會嘅調查，原來有人早於9歲前就首次接觸成人內容，甚至影響長大後嘅性生活。

香港性教育、研究及治療專業協會於今年2月至5月成功訪問到近1000名年齡介乎18-66+嘅本地人士，詢問其接觸首次成人內容嘅年齡，從中接收到嘅觀念，以及對其性生活嘅影響等。結果發現，有62%受訪者都表示於10-15歲期間首次接觸「色情片或照片」，更有15%表示九歲前就已經接觸過相關內容。

至於成人內容傳遞嘅觀念，有67.5%受訪者指接觸過嘅內容都「沒有提及安全性行為」、62.7%指相關內容「沒有提及性行為是需要負責任」。另外亦有分別有33.4%人及20.7%受訪者指，相關內容傳遞了「女人就不其實心裏是喜歡」以及「女人只是用黎滿足男人性慾的一件物品」等觀念。

不過整個研究最「搶眼」嘅數字，係有16%受訪者自稱對色情短片或照片成癮，更有15%表示喜歡自慰多於與伴侶性交。

圖片：截圖自 https://docs.google.com/forms/d/e/1FAIpQLSedKUdLG_ysucB0vhr341JavSzU6Cc2mB_cjaS0yXI5Xgba1w/viewanalytics

值得一提嘅係，是次研究嘅結論定調於「受了這些影響後，青少年日後成長、結婚或有固定伴侶，一部分人可能有性功能障礙」，部份受訪者亦於問卷最後嘅意見部份，指出問卷部份選項「太有預切立場…只有色情對青少年嘅負面影響」，亦有人提出性生活不美滿可以因為生活其他因素 (如工作壓力等)，並非與觀看色情內容有關。另外亦有人提到對於冇伴侶嘅人，自慰是解決需要的唯一途徑。

或者整個研究最有意義嘅結論，係於男女比例為40:60嘅情況下，有83%受訪者表示有自慰；而52%受訪者表示每週自慰一次。

資料來源：HKASERT