雖然話為咗令年青人學識有責任而且安全嘅性行為好重要，但一般嘅「性教育」課堂，除咗拎張解剖圖黎同學生們講邊度係睪丸邊度係子宮之外，基本上就係不停同大家講「唔好做愛，會有病、會搞出人命，會好麻煩」，就算戴咗安全套都唔係100%安全，簡單黎講就即係靠嚇。至於成效有幾大、對年青人又會造成咩影響，相信大家都應該親身感受過。

近日外國就有個研究指出，其實「教大家如果獲得快感」嘅「正向性教育」，比起一味靠嚇係有用得多。

圖片：Pexels

來自英國牛津大學及世衛組織嘅一群研究員近日發表咗一個報告，指分析過由2005至2020年，全球多個來自不同國家、針對不同年齡、性別、性向嘅性教育案例後，發現假若教育內容有包含「如何從性中獲得歡愉」——亦即係絕大部份人進行性行為主因——其教育效果會大幅提升。

於眾多研究中，佢哋提出其中8個鼓勵大家使用安全套嘅性教育案例。發現當中有啲會教大家「如何令使用安全套變得更有趣及性感」，又或「使用潤滑劑增加快感」等正向性教育訊息，有啲就一味靠嚇。而接受正向性教育嘅人當中，將來感染性傳染病嘅機率比起接受傳統性教育嘅人低50%，顯示正向性教育更能推動大家使用安全套 (從而避免感染)。

圖片：Pexels

雖然是次研究只能證明「正向性教育」與「更安全嘅性行為」有關 (Correlated) 而非有因果關係 (Causal related)，但研究員就指出如果想性教育更有效，與其靠嚇令大家連愛都唔敢做，不如向大眾宣傳安全性行為嘅好處，例如能從中獲得快感、親密感覺、保持身心健康，令大眾有自主性去追求安全嘅性歡愉。

資料來源：Incorporating sexual pleasure in educational sexual health programs can improve safe sex behaviors