大家有冇上網做過啲聲稱可以測智商 (IQ) 嘅測驗？如果測出黎個結果話你得70，你會點做？你會唔信個測試！但如果測出黎你係IQ 140嘅天才你會點做？你會即刻Cap圖Post上網！實際上過往就已經有研究發現，平均而言，所有人都係傾向高估自己嘅智商，但近日就有一個研究指出，原來男人係更傾向大幅高估自己智商，即係你班男人其實冇你哋自己以為咁聰明呀！

澳洲昆士蘭州Griffith大學應用心理學系教授David Reilly近日發佈咗一篇文章，指為咗進一步研究「高估智商」呢個現象，所以佢哋搵黎一群成年男女受訪者，並詢問佢哋，如果平均智商係100，佢哋認為自己嘅IQ係幾多，同時亦會問一系列關於自我形象、心理性別——更傾向雄性 Masculine) 定雌性 (feminine)——嘅問題，希望搵出大家高估自己智商嘅原因。

結果就發現，受訪者自評智商嘅平均分係107.55分，即不分男女，整體而言所有人都認為自己嘅「智商」高於平均 (100分)，於統計學上明顯係唔可能嘅。而且縱然男女對自己嘅智商評分都唔準確，但男性更傾向大幅高估自己嘅智商，例如有人實際智商為80，但就估自己有115；而女性雖然同樣有高估嘅情況，但高估嘅幅度就「謙虛」得多，甚至有實際智商高達140嘅女性，估自己嘅智商低於110嘅情況。另外，無論真實性別係男定女，只要心理性別傾向「雄性 (Masculine)」，又或自我形象較高者，都會更傾向高估自己嘅智商。

值得一提嘅係，過往已經有研究證實，智商高低與性別其實係冇關，咁點解男性都會大幅高估自己嘅智商？研究團體估計，可能係來自社會嘅刻板印象。另外一啲研究曾經要求父母去估自己子女嘅智商，結果兒子嘅平均得分同樣高過女仔，而父母嘅期望又連帶影響子女們嘅自我形象，令男仔更傾向覺得自己更聰明，長大後亦更傾向去從事一啲需要高智商嘅工作或挑戰；反觀女性對自己嘅智商有更謙虛嘅估計，於是長大後就會認為自己唔能夠勝任高智商嘅工作，此現象於科技工程界就更為顯著。而又因為女性傾向選舉「較易」嘅工作，薪酬自然冇傾向選擇「較難」工作嘅男性多，結果造成依家非常多人談論嘅「男女薪酬差異」問題。

資料來源：abc.net.au