唔少男仔覺得自己個樣都算四四正正、份人又誠實可靠，但偏偏就係識唔到女仔；反觀隔離阿強吊兒郎當，但就因為把口了得，所以Keep住有拖拍，最後得出嘅結論就係「我輸在唔識Flirt女！」咁實際上又應該點Flirt女？咩係Flirt？外國媒體《Mindbodygreen》就搵黎兩性關係專家Clara Artschwager，提出調情嘅八大建議。

首先，所謂「Flirt (調情)」，其實係「向潛在對象展現出性興趣」，當中包括言語、身體語言等溝通方式。而Clara就指Flirt嘅最大要點就係要「真」，「去諗『點樣可以Flirt得好啲』本身就已經厄殺咗你進行呢種互動嘅能力」，佢提議大家應該問題自己：「我點樣可以更做自己？點先可以令自己覺得自在？」而「做自己」所帶來嘅自信先係最吸引人嘅地方。

另外佢亦建議大家可以更主動，而且清晰地提出自己對關係嘅期望。佢話過去呢幾年大家都有好多時間「反省」，對於愛情關係嘅要求亦更加清晰，所以以往流行嘅曖曖昧昧反而不受歡迎。一開始就知道大家是否同步，啱嘅就試下發展、唔啱嘅就另尋目標可能更有效。

Clara亦指因為疫情影響，大家都習慣慢慢地與新朋友建立關係，可能由視象約會開始，再到保持社交距離嘅實體活動，例如公園散步之類，大家輕鬆地交流、循序漸進，啱Feel先再進行更親密嘅約會，而非劈頭就瘋狂調情希望將對方帶返歸。

仍亦建議大家要留意自己身體語言，例如有眼神接觸、微笑，身體正向對方，模仿對方嘅動作等，都係人類對對方有興趣時會有嘅自然動作，當中嘅重點在於「自然」——如果你係諗住將所有動作變成「套路」咁使出黎，對方係好有可能發覺，而且會令對方更不自在。

喺言語方面，Clara就建議大家真誠地稱讚對方，而且唔係淨係讚對方嘅外表，「如果你哋講開大家最鍾意嘅樂隊，稱讚對方嘅音樂品味；或者你哋於交友App認識，而對方Post咗張攀石嘅相，可以稱讚對方好勇敢同有冒險精神，呢種稱讚會令對方感到被在意及欣賞。另外要注意嘅係稱讚要簡而精——唔好寫篇千字文去稱讚對方，咁反而會令對方覺得你太Chur。

另外Clara認為「真實嘅對話本身係調情嘅一種」。所謂「真實對話」係指正常人會有嘅對話，而非大家諗起「調情」時會腦海中出現嘅「金句」。哪怕係問對方時間、喺在某個活動中問對方點認識某個共同朋友等，都係開始真實對話嘅好方法。透過對話，對方會感到你對佢嘅生活有興趣。

除咗在意自己做啲咩、講啲咩之外，Clara亦提醒大家要留意對方嘅反應。對方同你有冇眼神接觸？佢哋有冇不經意地拉開距離？如果大家係傳訊息，佢哋回覆會唔會好簡短？如果對方並無回應你嘅興趣，你唔應該誤認為對方想你更出力，而應該明白對方對你冇興趣。當然大家亦要學識接受拒絕——冇理由所有人都對你有興趣，被拒絕並唔係咩奇事。

最後佢亦提醒大家「唔好太在意」，佢舉例指：「就好似Marketing嘅人刻意想推出一個會網絡瘋傳嘅計劃，通常都係唔會成功，因為呢啲嘢係冇得Plan嘅。」同樣道理，如果你好在意自己講啲咩，做啲咩先吸引到對方嘅興趣，反而會錯過咗當下與對方真正溝通了解嘅機會。

資料來源：mindbodygreen