一名原本為男性嘅蘇格蘭殺人犯於獄中決定跨性別，並改到女子監獄服刑，近日佢更稱自己係個嬰兒，要求獄方提供尿片、嬰兒食物以及奶咀。而獄方雖然「沒有針對囚犯視自己為嬰兒嘅相應守則」，但就認真考慮緊佢嘅要求，據知目前已經提供咗奶咀。

Sophie Eastwood

圖片：Daily Record

卻說2002時，蘇格蘭一名叫做Daniel Eastwood嘅16歲青年因為危險駕駛而被判入少年監獄；2004年，Daniel於刑滿前幾個月用鞋帶勒死22歲嘅倉友，結果殺人罪成被判終身監禁。然後到2016年時，原本以為自己係同性戀嘅Daniel「發現」自己應該係一個女性，於是喺2018年開始服食賀爾蒙藥物，並改名Sophie Eastwood轉到女子監獄服刑。

但近日Sophie Eastwood就再次「發現」自己原來唔單止係一個女性，更係一個嬰兒，並要求獄方為佢提供尿片、將食物攪碎成嬰兒食物、奶咀，以及出入時要獄警拖住佢隻手等要求。

圖片：Perthshire Picture Agency via Daily Record

據獄方知情人士透露，雖然近年「男跨女」現像於獄中越見普遍，「但 呢單明顯地係完全唔同，蘇格蘭獄方冇任何現存守則去處理視自己為嬰兒嘅囚犯」。知情人士形容Sophie Eastwood係一個「多年黎都難搞而且有操縱性」嘅人，所以即使Sophie已完成15年最少監禁期，但獄方目前冇意將其釋放。「佢非常複雜及聰明，同時對獄中資源有非常高要求，而且享受被大家注意。所以好難知道佢究竟係真心覺得自己係個嬰兒，定佢只係希望大家留意佢。」知情人士亦指，現代監獄近年非常著重人權以及連帶嘅法律含義，所以獄方係認真考慮緊Sophie Eastwood提出嘅要求。

資料來源：Daily Record