隨住大家對「性」越黎越開放，大家為咗「求開心」，所謂嘅「隨便性關係 (Casual Relationship)」已經唔算係罕見嘅事，咩one night stand咩SP大家就算未試過都一定有聽過。但近日一個研究就發現，雖然男女進入隨便性關係嘅機率幾乎一樣，但事後嘅情緒就好唔同。甚至女士們事後其實唔係太開心架咋。

研究由來自澳洲Monash大學嘅團隊進行，佢哋以問卷方式訪問咗701個年齡介乎18-82歲嘅男女，當中大約一半目前處於承諾關係，另一半就報稱單身，而問卷就係關於佢哋最近一次「約炮 (Hook-up，研究將其定義為「由接吻到性交等所有於承諾關係以外嘅性接觸」) 」經驗，例如動機、事後嘅情緒等等。結果就發現，比起男性，女性更傾向被「覺得自己好慘」、「覺得寂寞」、「對現狀不滿想變得更好」等負面情緒推動而約炮。問題更嚴重嘅係，女性們約完炮之後，亦同樣更傾向出現「寂寞」、「不快」、「後悔」、「害怕被指責」等負面情緒。亦即係話女性更傾向因為負面情緒而去約炮，但約完之後反而有更多負面情緒。

而男性於約後就更傾向出現「性滿足」、「開心」、「自信」、「滿意」等正面情緒。

研究團隊指出，佢哋搵唔到有任何動機 (不論係正面或負面，不論男女) 能夠有效預測約炮後有正面後果 (注意，唔係代表約炮冇正面後果，只係代表與動機無關)，但從研究就可以推斷，如果你約炮嘅動機本身就係負面嘅，例如希望減輕壓力、舒緩負面情緒等，約炮後個結果通常係唔好嘅。