現代人離婚率高企並唔係咩新聞，亦係唔少國家政府需要面對嘅社會問題。而近日一個美國研究就顯示，原來有個非常簡單嘅方法可以幫助解決婚姻問題、令夫妻唔會走到離婚呢一步——增加最低工資。

來自美國UCLA婚姻及親密關係研究所嘅Benjamin Karney教授，過去三十年都專注於研究美國低收入家庭嘅離婚問題，其中又最為關注政府政策對於低入家庭嘅影響。佢話一直以黎，面對高離婚率問題時，美國政府都以推廣「關係教育」為解決辦法，「好似係話低收入夫婦之所以離婚，完全係因為佢哋唔識溝通咁」。但Karney教授就認為呢個政策與佢嘅觀察結果並不一致，於是從兩個大型人口普查合共36萬個家庭嘅數據中，抽出最有機會逗緊最低工資嘅18至35歲人口出黎，對比美國政府過去嘅政策作出分析。

結果佢發現，每次美國政府提高最低工資，低收入家庭嘅收入都有顯著上升，而且商家們一直「威脅」嘅「工時下降」並無出現。同時最低工資嘅增加亦令到18至35歲人口嘅結婚率及離婚率同時下降。Karney教授指出，最低工資每增加1美金，1至2年內嘅結婚率就會降低3%-6%，而離婚率更會下跌7%-15%。

Karney教授嘅研究可謂反面印證「貧賤夫婦百事哀」呢句話。教授指出，只要政府政策能夠改善家庭嘅財政狀況、提升生活水準，唔需要進行任何教育工作都已經可以對結婚率及離婚率造成重大影響，「只要有足夠資源，伴侶們唔需要關係諮詢幫忙，自己就能夠搵到溝通嘅方法。」

但Karney教授亦指出，是次研究只能搵到最低工資與離婚之間有因果關係，但未能確切指出當中的機制，「可能係因為減輕財政壓力、可能係提升伴侶對將來嘅希望，可能提升自我價值，又或可能係其他原因」，需要未來更多研究探討。

資料來源：PsyPost