黃子華曾經於棟篤笑中分享過，佢啲妹覺得世界上最好笑嘅節目，係選美；而我相信唔少Gentlemen都曾經親身見證過，當女人遇上一個比佢更加靚、身材更加正嘅女人，通常都冇咩好嘢講。但你又有冇諗過點解？加拿大一個研究近日就證實，女人之所以唱衰其他女人，主要係因為妒忌，而妒忌嘅背後，其實係想從「擇偶比併」中勝出！

來自加拿大Ottawa大學及Nipissing大學嘅三位研究員，日前發表咗個名叫「妒忌調節外貌比較與女性八卦之間的關係」嘅研究報告。報告指，佢哋搵黎182名年齡屆乎18-39歲嘅北美女性，以「評價雜誌廣告有效性」嘅名義邀請黎做實驗，其中一半人真係睇產品廣告，但另一半人就係睇包含裸體或穿著內衣、比堅尼嘅性感女模特兒廣告。

睇完後參加者會收到一個關於虛構人物「Veronica」嘅7項資訊，其中四項為正面資訊 (如：能說四種語言、天才般的IQ)、另外三項係負面資訊 (如：出軌)，而參加者就要回答佢哋有幾願意去分享每一條資訊。另外參加者亦會進一個評定佢哋 (對於個廣告模特兒)嘅妒忌程度測試。

結果發現，越傾向將自己與其他女性作「向上外表比較 (即係同靚過自己嘅人鬥靚)」嘅女性，佢哋嘅妒忌評分都越高，同時佢哋亦更傾向分享比自己靚嘅女性嘅「負面八卦」。用返人話講就即係「一個妒忌嘅女人會睇唔過眼靚過佢嘅女人，再唱衰佢。」

或者大家會認為呢個研究係「鬼唔知咩」，但研究其實有進一步提點解女性會有呢個行為。報告指出，大部男人都會將「靚」當成重要擇偶條件，換言之女性要於「擇偶比拚」中勝出，就要同其他女性鬥靚。咁萬一真係唔夠人靚可以點做？可以進行「自我推銷戰術」(即係增加自己吸引力) 又或者「貶低對手戰術」(降低對方吸引力)，而「唱衰對方」就係其中一種間接貶低對方嘅方法。再換言之，「妒忌」其實就係人類女性進化出黎嘅「適應性心理機構」，用黎「補償」自己於「擇偶比拚」中嘅不足。

資料來源：Envy Mediates the Relationship Between Physical Appearance Comparison and Women’s Intrasexual Gossip