雖然性愛對於大部份人黎講都係生活中嘅一部份，但同時佢亦係大家嘅禁忌話題之一，就算對住伴侶有時都好難向佢透露你自己嘅癖好。例如於歐美成人電影中常見嘅「肛肛好」，唔少男士就算想試，都因為怕女方反感而唔敢提出——不過近日一個美國研究就發現，原來會享受「肛肛好」嘅女性比例，比起想像中要多好多！

卻說來自美國印第安納大學嘅Devon J. Hensel，早前進行咗目前第一個大規模關於女性對於「肛肛技巧」嘅享受程度調查，透過問卷訪問來自全球嘅4,270名女性、再加1,000個單對單訪問，最後整理出3,017個年齡屆乎18-93歲嘅女性嘅數據。結果發現有40%女性都對「肛肛接觸 (即係接觸週邊，非進入)」感到愉悅、對於「肛肛配對 (即係同時刺激前後)」感到愉悅嘅同樣有40%，對「肛肛進入 (以手指、性玩具或下體進入不多於一指節)」感到愉悅嘅女性就有35%。換言之大概有三份一嘅女性都對不同程度嘅「肛肛好」感到愉悅，比起大眾預期要高得多。

更重要嘅係，分別有56%及68%女性表示一開始「肛肛接觸」及「肛肛配對」嘅時候，並唔會感到快感，但隨住時間推移，佢哋就會慢慢享受其中，換言之呢樣嘢似乎係可以慢慢開發？

不過要注意，閨房之樂在於溝通。如果你真係有興趣同伴侶試試佢，緊記要同伴侶事先溝通好，千祈唔好諗住畀個驚喜對方呀下。