相信大家都會同意，男人就係會睇AV、睇J圖 (如果一個男人話佢冇，佢一定係講大話，一定！)，但雖然大家都會睇，總有啲人係睇得特別多。一般黎講大家都會認為睇得多嘅人係因為「咸濕」，不過近日一個英國研究就發現，原來睇得多唔多「成人內容」，係同你覺得人生有冇意義相關。換言之，睇AV、睇J圖其實係因為你悶呀！

來自愛爾蘭Limerick大學嘅Andrew B. Moynihan及其團體，早年就做過一個研究，指如果一個人經常覺得悶，係會令佢覺得生命缺乏意義，繼而轉向不健康飲食、性愛等「享樂行為」以作逃避。近日團體就進行咗一個跟進研究，睇下「觀看成人內容」屬唔屬於呢啲享樂行為之一。

於是佢哋搵咗179名來自愛爾蘭及英國嘅成年人，並要求佢哋回答一份關於平時生活習慣、對人生意義嘅睇法，以及對成人內容睇法嘅問卷。

結果就發現，如果一個人同意如「我的人生缺乏清晰目的」等陳述，佢就有更大機會同意「大部份情況下，很難找到能令我保持有興趣的事物」同時佢哋亦有更大機會同意「成人內容提供一個從人生挑戰中分散注意力的機會」呢類陳述。研究同時發現，一個人越覺得生命冇意義，就越有機會轉向成人內容尋求性歡愉，以及為生活提供一啲新意。

簡單啲黎講，就係對部份人而言，觀看成人內容乃係佢哋面對「生命冇咩意義」嘅挑戰，而希望為生命「搵些少意義」時嘅行為。咁唔知大家又搵到你嘅人生意義未呢？

資料來源：Pornography consumption as existential escape from boredom