多年前因出色「口技」而登上日本綜藝節目《矛盾大對決》再爆紅嘅「拓也哥」，其個人部落格今日突然貼出通知，指拓也哥已於9月16日因病離世，享年47歲。

圖片：コレステロールタクヤ

據公告指，拓也哥於9月16日離世，喪禮會以私人形式舉行，而其名下兩間酒吧中，新宿店會由副店長接手，而名古屋店就會結業。

據報拓也哥於2013年就已經驗出患有糖尿病，但當時佢冇及時治理，到2017年因糖尿併發症而需截掉右腳小趾。後來佢又於2021年截除左邊小腿。翻查其個人部落格及Twitter，亦可以見到佢今年多次入院，Twitter上最後一次更新為今年8月20日，當時佢再次入院並上傳只見到額頭嘅自拍照。

拓也哥本為日本同志酒吧老闆，當年於《矛盾大對決》對戰號稱「絕對不會射的男人」男優澤井亮並成功擊敗對手而爆紅，片段更於亞洲引起廣泛討論，後來拓也哥更曾出演台灣電影《沙西米》，更登上台灣知名綜藝節目《康熙來了》，於香港亦有一定知名度。