大家都知第一印象非常重要，特別係男女之間嘅首次約會，雙方嘅表現會決定大家仲會唔會有下次見面嘅機會，甚至能唔能夠發展成為戀人。問題係，究竟要做啲咩，先能夠令對方留下好印象呢？近日一個研究就試圖搵出首次約會中，能夠令對方留下好印象嘅行為。有趣嘅係，研究發現男性及女性會做嘅嘢非常類似，但需要嘅嘢就有好大分別。

來自美國佛羅里達州Bucknell大學嘅研究員Jimmy Moran表示，佢曾經於一間酒吧內見到一位行為過激、嚇到女方起身走人嘅男性，令佢對男女於初次約會中嘅行為及成效產生興趣，於是佢進行咗一個三階段嘅研究。

首先佢透過Facebook及某間大學招募100名男女受訪者，並要求受訪者要列出其性別能夠於初次約會中進行、增加雙方第二次約會機會的行為。其中男性認為最有效嘅四個行為分別係「深入對話」，「畀錢」，「展現幽默感」以及「維持眼神接觸」；而女性則認為「講笑話或嘗試搞笑」，「問對方問題」，「保持禮貌及尊重」以及「打扮漂亮及化妝」為最有效。

縱然兩性提出「自已可以做」嘅行為都有相似之處，但進一步研究就發現，雙方實際上「想要嘅嘢」大有不同。研究第二部分，團隊首先將第一階段中受訪者提出的行為，分為「禮貌 (euiqutte)」、「投入 (involvement)」以及「行為 (Behaviour)」三個部分，再搵黎另外131名受訪者，向呢啲行為嘅有效性作出主觀評分。

結果發現，男性受訪者認為女性作出「投入」類行為，例如保持眼神接觸、良好身體語言、微笑以及提出問題等，會增加佢哋進行第二次約會嘅機會；而女性受訪者則認為，男性展示出「禮貌」類行為，例如保持友善、細心、聆聽等，會增加第二次約會的機會。簡而言之，就係男性希望女性於首次約會中表現出興趣及投入，而女性就希望男性展示其友善，以及符合社會禮節嘅行為。

更有趣嘅係，研究團隊用上述結果檢視Netflix約會節目《Dating Around》(內容為男女分別與數名異性約會，最終選擇一位再約會)，試圖預測出參加者最終嘅選擇，但結果發現上述行為都無辦法準確預測出結果。研究團隊表示，可能係因為節目中嘅約會過程經過大量修剪，無法準確反映現實生活中的約會體驗；但亦有可能表示大家以為有用、想對方做嘅的行為，唔係實際上有效嘅行為。詳細需要進一步研究。

資料來源：Dating Around: Investigating Gender Differences in First Date Behavior Using Self-Report and Content Analyses from Netflix