男女之間嘅「吸引力法則」，素來都係兩性關係學者們嘅研究議題之一。而過往有多個研究都證實，(異性戀) 男性嘅對於女性嘅吸引力評價，其實與女性透過動作、氣味等細微特質展現出黎嘅生育能力相關，所以就令學者產生另一個疑問：「究竟男性能否有意識地分辨出女性嘅生育能力？」而最新嘅研究答案就係：「唔得！」

來自美國Oakland大學心理學系教授Lisa L. M. Welling日前發表咗一個研究，試圖探討男性能否透過處於不同月經週期階段嘅女士大頭照，分辨出照片中女士嘅生育能力，同時月經週期階段又會否影響男士對女士嘅吸引力評價。研究團隊先收集多組女性照片，每組照片包含同一名女性於黃體期 (即女性排卵過後，最不容易懷孕嘅月經週期)及 後濾泡期 (即接近女性排卵，最易懷孕時期) 拍攝嘅大頭照。然後再搵黎182名年齡介乎18-52歲、包含單身及有伴侶嘅異性戀男性，並對每組女性大頭照作出吸引力及生育能力評價。

結果發現，處於後濾泡期嘅女性大頭照嘅吸引力得分，的確高於處於黃體期嘅大頭照，亦即再一次證實女性生育能力、月經週期會影響男士對佢哋嘅吸引力評價。但更有趣嘅係，研究發現男性根本無法透過大頭照準確判斷相中女性處於嘅月經週期，亦即係話「生育能力高嘅女性更加吸引」呢回事，完全處於男性嘅潛意識當中，並非一個能夠控制嘅主動判斷。

研究同時亦發現，偏好長期關係嘅男性受訪者，會對處於高生育能力週期嘅女性大頭照作出更高評分，換言之佢哋潛意識會比起偏好短期關係嘅男性更著重女性嘅生育能力。

資料來源：A Preliminary Investigation Into Individual Differences that Predict Men’s Preferences for Cues to Fertility in Women’s Faces