先旨聲明，性伴侶數目呢家嘢應該係不分高低，更冇所謂好壞之分，單純就只係一個統計數字——只係大家都對呢個數字好好奇咁解啫！近日外國Reddit討論區中，又有人分享咗由「World Population Review」整理出黎嘅「全球46個國家/地區平均性伴侶數目」，結果土耳其以人均14.5名性伴侶居首，而香港就僅以3.7人，成為名單上嘅倒數四。

圖片：World Population Review

「World Population Review」嘅數據係整理多個其他統計而來，所以各國嘅數字未必來自同一時間段，絕大部份非洲及理論上更開放嘅南美州國家亦不被包括在內，所以並非一個非常嚴謹嘅統計，不過從中亦可以睇出一啲有趣嘅趨勢。例如除咗榜首土耳其外，名單上前十嘅國家仲有澳洲（13.3）、新西蘭（13.2）、冰島（13.0）、南非（12.5）、芬蘭（12.4）、挪威（12.1）、意大利及瑞典（11.8）、同埋瑞士及愛爾蘭（11.1），當中大部份國家都靠近兩極，唔知係咪天氣凍大家就鍾意床上活動。

而大家成日覺得好開放嘅「歐美」國家，排名其實就唔特別高，例如加拿大及美國都以10.7人排12、英國9.8人排20、出名浪漫嘅法國人以8.1個性伴侶排28、德國亦只有5.8人，與馬來西亞並列38。

亞洲各國方面，泰國以平均10.6個性伴侶成為亞洲第一，並與希臘、以色列並刊全球13；日本則以10.2人成為亞洲第二，下一個榜上有名嘅亞洲國家已經係新加坡嘅7.2人排31。兩岸三地中，台灣以6.6人排34，香港則以3.7人排42，即倒數第四，中國就以3.1人，僅以小數點之差壓過印度唔使包尾。

資料來源：World Population Review