如果你對日本網絡文化比較熟悉，咁你或者有印象見過呢張「麥當勞薯條山」照片。呢張一睇個像素就知年代有返咁上下久遠嘅照片，自從約十年前出現後就一直於日本網絡上流傳，成為日本網絡著名Meme圖之一（雖然頻率不高，大概係「年經」程度），甚至美國CNN都曾經報導過。而近日相中主角之一、坐左前方個眼鏡少年就重回舊地、重現經典，而且仲接受傳媒訪問，親解當年照片背後嘅故事。

雖然唔少人都以為呢張圖係來自日本，但據呢位不願開名、曾到日本留學、能講流利日文、現居南韓釜山嘅26歲南韓大學生指，事發地點其實係南韓釜山嘅麥當勞「釜山大學2號店」。

卻說當年佢於韓國社群媒體「KaKao Talk」上認識咗一班同樣對電玩、動畫感興趣嘅網友，於是相約於2013年2月23日去參加某個動畫活動。事前佢哋忽發奇想，打算計劃「做件白痴事」，所以前一日就打去麥當勞預約咗價值300,000韓元（約HK$1,800）嘅大薯條。據佢回憶，當時一行大約15人左右，而最後黎咗大約150盒大薯條，換言之每人平均要食十盒，而隨住薯條慢慢上檯，佢哋自己都開始笑唔出。

少年指出，當時店員用咗兩個鐘先炸好150盒薯條，而少年們當然就食唔哂，最後係每人打包咗啲返屋企。而當時有路人拍下「薯條山」嘅照片並放上網引起哄動，結果就令張相於日、韓網絡流傳多年。少年指初時佢非常擔心照片會成為佢嘅「數位紋身」（即成世都洗唔甩嘅紀錄），但後來佢自己都接受現實，有時仲會主動拎張相出黎同朋友炫耀。

而最近嘅2月23日，佢就獨自回到麥當勞「釜山大學2號店」嘅同一個位食薯條，並拍下認證照放上網。少年指佢係刻意選擇與薯條相似嘅「11」週年黎重現呢個經典Meme圖。而當時佢拜託路人幫手拍照時，路人都發出感嘆：「原來你咁出名」。至於當年同行嘅另外14個朋友，少年就表示只有兩名仲有聯絡，「其餘的人都生死不明，希望他們安好吧」。

資料來源：maidonanews