食開日清杯麵嘅大家，相信都對杯麵入面嗰堆唔知係咩肉、唔知點整、但口感同味道都頗為特別嘅「謎肉」非常熟悉，甚至有人係為咗食「謎肉」所以先買日清杯麵黎食。如果你都對「謎肉」情有獨鍾嘅話，咁你就好彩啦，因為日本日清宣佈推出單獨發售嘅「謎肉放題」，甚至可以一開即食！

日本日清早前宣佈推出「謎肉放題」，其實就即係一整盒謎肉乾。除咗可以用黎為杯麵加料之外，日清官網上亦提供多種食法、食譜，例如相對合理嘅「謎肉炒飯」、「謎肉蓋飯」、「謎肉肉醬意粉」，又或要先將「謎肉」浸軟、打爛先整到嘅「謎肉漢堡」以及「謎肉釀青椒」。最令人驚喜嘅，就係「謎肉配啤酒」，換言成盒「謎肉」可以當零食咁乾啃。一盒200g賣650Yen，即係港紙$34蚊，有機會都真係買返兩盒旁下身。

「謎肉炒飯」

「謎肉蓋飯」

「謎肉肉醬意粉」

「謎肉漢堡」

「謎肉釀青椒」

「謎肉配啤酒」

所謂「謎肉」，其實係以豬肉、大豆、蔬菜混合而成再冷凍乾燥嘅加工肉品，自1971年就已經於日清杯麵中出現，而且多年黎一直深受日清杯麵Fans喜愛。而日清杯麵亦經常拎「謎肉」黎做宣傳，例如早於2016年日清杯麵迎來45週年時，就曾經推出過有十倍「謎肉」嘅「謎肉祭」杯麵。

資料來源：日本日清官網