對於感情狀態，一般人大概只會分「單身」同「已婚/有另一半」，大不了就加埋「離異」同「it's complicated」落去，但你又知唔知道，外國大學生中出現一種叫做「純傾計（Just Talking）」嘅感情狀態，處於呢種狀態嘅人唔一定真係「純傾計」，但又唔係借傾計為名、做愛為實。究竟係一種咩感情狀態呢？

為咗了解咩係「純傾計」，美國紐約Binghamton大學人類性學研究室嘅研究員Melissa Hardesty及其團隊，進行咗一個兩階段研究。首先以問卷方式，向403名來自多間美國中型公立大學嘅學生詢問「純傾計」嘅實質定義。結果發現，雖然「純傾計」的確可以包含親密肢體接觸，但更重要嘅係當中「不需負責」嘅元素。受訪者亦表示「純傾計」係雙方進入更正式（責任更大）關係嘅前奏，係一個事前互相了解嘅過程。

另外，研究團隊特別提到，受訪者對於「純傾計」狀態下嘅情感及肢體接觸接受程度有非常大嘅差異，顯示「純傾計」其實係有一定程度嘅模糊。

第二階段，團隊就拎住問卷結果，與其37名大學生進行小組訪談，希望進一步探討「純傾計」嘅細節。從訪問結果得知，大學生視「純傾計」為「探索及建立親密性嘅階段」，通常都係由社交媒體上開始，慢慢升華至更私人嘅溝通方式（可能係訊息、約出黎見面）。受訪者亦亦強調「純傾計」唔係為咗上床，而係有潛力去建立更深、更個人嘅聯繫。從中雙方都可以了解對方嘅興趣、思想、價值觀，以評定是否進入有承諾嘅關係，同時保留一定程度嘅自主及自由。

而Melissa Hardesty就指出，與其話「純傾計」係一種感情狀態，更準確嘅描述應該係「求偶過程中嘅一步」。佢指出於大學生中流行嘅「Hookup文化」，與對方有情感連結被視為禁忌，而「純傾計」就令學生們可以與對象建立情感聯繫，同時又淡化聯繫嘅重要性，「畢竟佢哋只係『純傾計』嘛！」。

資料來源：What Are College Students Talking About When They Say They’re “Just Talking?”