網絡發達以及社交媒體拉近人與人之間嘅距離，但有時候又會增加情侶之間嘅猜疑。咁假如你係一個好伴侶，又想令另一半安心，你可以點做呢？近日一個來自美國亞利桑那州立大學嘅研究就發現，最有效嘅方法，其實係主動斷絕外來者嘅威脅。

亞利桑那州立大學嘅社交聯繫及正向心理學研究中心早前發表咗一個，關於乜嘢行為會令伴侶覺得你對關係更投入嘅研究。研究先係進行兩次事前測驗，整理出24個令伴侶覺得你有投入關係嘅網上行為，再將呢24個行為隨機分配畀900名受訪者睇，然後要佢哋評價該行為展現出嘅關係投入度，結果就發現「刪除交友App」、「忽略挑逗訊息」、「表明自身感情狀況」以及「Unfollow潛在威脅者」四大行為最能提升伴侶覺得你有嘅投入度。

隨後研究團隊進行第二個實驗，受訪者先假設伴侶與另一異性於社交網站上有親蜜互動，然後隨機收到投入度高（向第三者表明感情狀態及Unfollow對方）或中立（Send搞笑片）嘅伴侶回應，研究團隊再於事前、事後分別量度受訪者嘅關係安全感及滿足度。

結果就發現，本身就有高度依附焦慮嘅人，面對上述假設案例時嘅不安、擔憂及妒忌都會比其他人高。而縱然伴侶嘅高投入度回答（向第三者表明感情狀態及Unfollow對方）的確能提升所有受訪者對於伴侶關係投入度嘅評價，但就無法顯著提升高度依附焦慮者嘅關係安全感及滿足度。團隊總結指出，縱然能夠展現關係投入度嘅行為確實重要，但就未必能夠減輕高度依附焦慮者隱藏在心嘅不安及恐懼。換言之，提升伴侶安全感嘅行為重點，並非主動對外宣告你對段關係有幾投入（例如上傳對方合照、公開感情狀態、讚好對方帖文等），而係主動斷絕來自第三者嘅威脅，亦即唔係要做加分嘅事，而係避免做減分嘅事。

資料來源：Responding to threatening online alternatives: Perceiving the partner’s commitment through their social media behaviors