21世紀都就黎去咗四份之一，相信大家都會明白「同性戀」或者「同性吸引」並唔係咩「被人教壞」，而有可能係天生、或者更準確講係基因所致。但問題係，基於達爾文嘅進化論，一切阻礙物種延續嘅基因，都應該於歷史長河中被淘汰，咁點解人類男性嘅基因入面都仲會有同性相吸、或者令佢哋行為較為女性化嘅基因存在呢？來自澳洲昆士蘭大學心理學嘅博士生Thomas Felesina就提出咗一個「理想爸爸假設」，近日仲做咗一個研究證明當中嘅可能性。

所謂「理想爸爸假設」，即係男性體內某啲與「同性相關」嘅基因，於異性戀男人身上展現出黎嘅時候，會另佢哋稍為多咗啲女性特質，而呢啲特質又會令佢哋尋找伴侶時有優勢，所以呢啲基因先會被保留下來。為咗驗證呢個假說，Thomas Felesina進行三個實驗。第一個實驗搵黎超過1,600名異性戀男子，並以問卷方式量度佢哋是否擁有「理想爸爸特質」，例如溫暖感、養育感、自我感覺女性化以及性伴侶嘅數量；研究團體再分析受訪者嘅男性近親中（如爸爸、兄弟或叔叔等）是否有同性戀或雙性戀嘅人，以間接顯示佢哋家族是否擁有「同性相吸基因」。

結果就發現，家族中擁有「同性相吸基因」嘅受訪者，於各項「理想爸爸特質」中都比家族無「同性相吸基因」嘅人要高。換言之有「同性相吸基因」，的確會令到異性戀男士更符合理想中嘅爸爸。

第二個實驗，研究團隊就整咗18個分別展現「純男性特質」、「男女特質混合」以及「純女性特質」嘅虛構男性個人檔案，並要求152名異性戀女性選出佢哋心儀嘅男性。結果發現「男女特質混合」嘅個人檔案最受歡迎，其次就係「純女性特質」，「純男性特質」敬陪末座。而且研究仲發現女性認為「純女性特質」嘅男士適合發展長期關係，而「男女特質混合」嘅男士，就長期短期關係都適合。

第三個實驗用返同樣嘅18個虛構男性個人檔案，但就搵黎一批新嘅女性受訪者，並要求佢哋就每個檔案有幾適合做個好爸爸而評分。結果就發現，「純女性特質」及「男女特質混合」嘅好爸爸評分，都比「純男性特質」嘅更高。

三個實驗加埋嘅結論，就係與「同性相吸」有關嘅基因，會透過展現出更適合做爸爸嘅特質，而為基因擁有者帶來進化優勢（即係更易將自己嘅基因傳落去）。

Thomas Felesina強調，所謂嘅「同性相吸有關基因」係多組不同嘅基因，而且有對人體、性格有多重影響，所以並不存在單一嘅「同性戀基因」。今次研究只係證實咗呢啲基因會為擁有者帶來溫暖感毛等「好爸爸特質」，並令佢哋於擇偶時享有優勢，所以先會於進化中被保留下來。

資料來源：The Desirable Dad Hypothesis: Male Same-Sex Attraction as the Product of Selection for Paternal Care via Antagonistic Pleiotropy