現年38歲、曾經加入過AKB48姐妹團SKE48及SDN48、以號稱「無限大」上圍而聞名嘅「手束真知子」，自2015起就以擁有者兼「製作人」嘅身份於外神田經營主題Cafe「発掘!グラドル文化祭（發掘！水著偶像文化祭)」。不過近日就傳出佢因為違規經營風俗事業而被捕。

據日本《週刊女性PRIME》引述知情者表示，「発掘!グラドル文化祭」係一間以「現役水著偶像為你服務」為主題嘅主題Cafe（コンカフェ），店內裝修為簡約嘅「會議室」風格，擺放咗幾張長枱，而包括「手束真知子」在內嘅一眾服務生––至少有出過下寫真，話佢哋係「水著偶像」又唔算錯––就會著住比堅尼為客人服務。

事實上服務員嘅性感衣著，並非「発掘!グラドル文化祭」違反日本「風俗營業法」嘅原因，重點而係店內提供嘅服務。據知情者透露，客人進店後可以自由與店員傾計、亦可以付費與店員拍攝即影即有照，仲可以加錢叫店員近距離、鳥低身、露出乳溝地表演煎Pancake，而且店內仲會有比堅尼舞蹈表演。加上店員經常會著得非常性感地於街頭招攬客人，以上種種「擦邊球」行為先係「発掘!グラドル文化祭」早前被日本警方盯上嘅原因。

「発掘!グラドル文化祭」官網上嘅服務生名單

圖片：https://www.guradorubunkasai.net/

知情者指出，早於2月時「発掘!グラドル文化祭」就已經引起日本警方注意，警方亦多次以便服放蛇及明刀明槍到店內調查，但「発掘!グラドル文化祭」一直都冇收斂。結果於5月中時有十名警方於營業時間到場查封整間鋪，「手束真知子」亦當場被拘捕。

《週刊女性PRIME》搵出5月17日時「手束真知子」曾於X（Twitter）上公告「発掘!グラドル文化祭」正在休業中，「到6月時我調理好身體後就會重開」。但知情者指出當時「手束真知子」並非身體抱恙，而係因為違反「風俗營業法」而要坐20日監。據知「手束真知子」於6月14日出獄後立即重開「発掘!グラドル文化祭」。目前店內已經取消可能會違法嘅行為及表演。

「手束真知子」亦曾舉行要付費參加嘅「說明會」，向Fans透露自己被拘禁20日、被罰百萬Yen以及留有案底一事。會上佢亦為自己嘅行為辯護，拍因為店附近有學校所以無法申請相關執照，又指自己曾經委托律師通知有關單位。知情者指出，由於「手束真知子」似乎沒有反省自己嘅行為，所以有部份員工已經離職。

2013年《週刊現代》寫真

「手束真知子」早於16歲（2004年）就以「原田桜怜」拍攝性感寫真DVD出道，當時就己經以超豐滿上圍而聞名。2009年時佢改名「前田栄子」並加入SKE48，但好快就用本名「手束真知子」改為加入同樣由秋元康製作、以性感為主題嘅新團體SDN48，並活躍至2012年團體解散。2013年時佢曾為《週刊現代》拍攝露點露毛寫真，當時曾經有人猜測佢下一步就係AV下海。不過佢就於2015年創立「発掘!グラドル文化祭」一直至今。

資料來源：週刊女性PRIME