現代男女人生中有多過一位性伴侶係非常平常嘅事，但不論東西方社會，對於男女嘅性伴侶數目同樣有「雙重標準」，大致上就係認為男人嘅性伴侶數目「唔介意多」，而女人嘅性伴侶數目「唔介意少」。而近日一個德國研究，就試圖從社會評價嘅角度，去計算出男女嘅「理想人生性伴侶數目」，即係你人生有幾多個性伴侶，會令社會對你有最高嘅評價？

為咗計算出「理想性伴侶數目」，來自德國Saarland大學嘅研究團隊進行咗兩次調查，總共搵黎360名德國大學生及成年人，去評價一位隨機分派七個不同「性活躍度」水平嘅虛構25歲男或女，從而得知每個「性活躍度」水平嘅評分，以及男女之間嘅差別。

研究結果之一，就係再次印證所謂嘅「男女雙重標準」。研究結果顯示，受訪者對於「性活躍度」高嘅男士評價，顯著地高於「性活躍度」高嘅女士；而對「性活躍度」低嘅女士評價，又顯著地高於「性活躍度」低嘅男士。換言之從社會評價角度而言，男人嘅性伴侶數目「唔介意多，但介意少」、女人嘅性伴侶數目則相反，「唔介意少，但介意多」。

但研究中最為新穎嘅結果，就係發現社會對於擁有「中度性活躍度」嘅男女評價最高。由於研究中嘅「性活躍度」背後乃係性伴侶數目、做愛頻仍、自慰頻率等多個指標，所以研究團隊可以整理出各種性行為嘅「理想數字」。例如對男性而言，最理想嘅係人生擁有4至5個性伴侶，當中2至3個為不認真嘅對象、初夜發生於18至20歲、每週做愛4至5次、自慰3至4次，以及每日產生2次性慾及性幻想。

而女性嘅「理想數字」就係人生擁有2至3個性伴侶，當中1至2個為不認真嘅對象、初夜發生於16至18歲、每週做愛3至4次、自慰2至3次，以及每日產生2次性慾及性幻想。

資料來源：Sexual (Double) Standards Revisited: Similarities and Differences in the Societal Evaluation of Male and Female Sexuality