作為一個男人，只要去過日本旅行，你就一定有去過（至少有諗過去）嗰啲成棟樓都係賣AV、寫真嘅DVD店。但據日本傳媒報導，呢啲DVD店嘅數量由2008年嘅日本全國超過3000間，到2024年只餘約900間，而且正以每年130間左右嘅速度結業，換言之最快7年左右就會完全消失。而為咗保住自己嘅生意，近年有DVD店開始尋求轉型，而佢哋嘅「救世主」，就係一眾單身男士非常熟悉嘅「TENGA」。

據《集英社Online》報導，成人DVD店結業嘅原因，主要都係因為網絡銷售嘅興起。當日本年輕人習慣於網上購買、觀看成人作品，甚至有Onlyfans等非傳統成人作品可以觀看，去實體店購買DVD嘅人自然就會減少。據日本「明治書店 池袋店」嘅社長「本多俊裕」指出，目前會光顧實體店購買成人DVD嘅，主要係對網絡不熟悉嘅中老年人，但又因為近年疫情，中老年人未必敢再進入通常都非常狹窄嘅實體DVD店而令銷情雪上加霜，亦逼使成人DVD店作出轉型。

而佢哋嘅「救世主」，就係著名成人玩具生產商TENGA。與DVD店相反，TENGA於年輕人之間享負盛名，但中老年人對佢哋認識不多，所以佢哋反而需要增設實體店以迎合中老年人嘅消費模式，亦令TENGA與DVD店就一拍即合。例如「明治書店 池袋店」於2022年起將整棟店嘅地鋪部份改成成人玩具專區，除咗展出TENGA及其女性向品牌iroha嘅產品，亦會擺放其他外國品牌嘅成人玩具。此舉令店鋪於2022至2024年嘅平均銷售額升咗115%、TENGA玩具銷售額升咗213%，而DVD銷售就只估店鋪營業額嘅38%。而且除咗男客人外，擺玩成人玩具仲吸引到情侶、年長女士以及遊客等多元化客人。

本多店長指出，整體而言實體DVD店越來越少係難以扭轉嘅趨勢，但轉型不僅能令部份DVD能夠生存下去，亦會帶動原本只對成人玩具有興趣嘅年輕人族群到店鋪不同樓層了解實體成人DVD，為DVD業界增加新嘅客群。佢亦提到雖然網上觀看成人內容非常方便，但作品突然下架嘅事亦時有發生，相反買咗DVD你就想睇多次都得；另一邊廂，如果實體DVD店完全消失，就會令到不諳使用網絡嘅中老年人「無片可用」，成為「AV難民」，所以實體DVD店依然有保留嘅價值。

資料來源：集英社Online