所謂「自古紅顏多薄命」，即係生得靚嘅女人往往唔長命。但如果你以為呢個世界真係咁「公平」嘅話呢，就大錯特錯啦！因為據美國一個最新研究，生得靚嘅人未必短命、亦未必長命，但生得樣衰，而且係特別樣衰嘅人，就好可能會特別短命！

卻說來自美國亞利桑那州立大學社會及家庭變化學系嘅Connor M.Sheehan，以及來自美國德州Austin大學經濟學系嘅Daniel S.Hamermesh兩位學者，早前做咗個關於「面部吸引度」及「壽命」之間關係嘅研究。佢哋從美國威斯康辛州長期研究（WLS）嘅數據中，搵出超過8,000名1957年高中畢業、2022年83歲嘅樣本，再另外搵與樣本同齡嘅六男六女，以高中畢業照為8000名樣本嘅面部吸引度評分，再與樣本嘅壽命作出比對。

結果發現，撇除教育程度、收入水平、健康因素等可能影響壽命嘅因素外，面部吸引度最低分嘅1/6樣本——即係最樣衰嘅1/6人——壽命顯著（統計學上嘅顯著）低於其他人。於20歲時，最樣衰嘅1/6女性預期壽命比其他女性低兩年，而男性則低一年。換言之「樣衰」同「短命」之間係有關聯。

更「可惡」嘅係，研究發現呢個關聯只出現於最樣衰嘅1/6人身上，只要唔係最樣衰嘅1/6，其他人不論美醜都與壽命無關。換言之生得靚就唔一定長命，但生得好樣衰嘅就好可能短命。

由於是次研究只係一個相關性研究，所以目前無法對「樣衰短命」嘅原因作出結論。不過兩位學者就推斷可能與外貌非常不討好嘅人要面對社會污名、就業歧視等有關。佢哋更指出「我哋嘅研究強調大家撇除外貌，公平對待所有人嘅重要性。」

資料來源：Looks and longevity: Do prettier people live longer?