鍾意吹噓自己下體有幾大、幾長可謂天下所有麻甩佬嘅天性，但如果下次你聽到有人咁講，就可以用斷水流大師兄嘅名句：「我唔係針對你，我係話在座各位都係垃圾」黎應付佢。事關跟據網上最新數據，不論係講緊下體長度定粗度，香港男性都係全球嘅末段班，如果計體積嘅話更係全球尾8！

圖片：WorldPopulationReview

話說網站「World Population Review」日前公佈最新嘅「全球男性下體大小報告」，亦即整合不同國家最新相關研究（但唔一定係2024年）嘅數字並作出排行。較為特別嘅係報告除咗常見嘅長度之外，仲有粗度以及整體體積兩項比較少見嘅數據。

據報告整理，全球男性下體平均長度大約為12.9cm至13.92cm左右（視乎不同研究）。而當中最長嘅係蘇丹男性，平均有17.95cm；粗度（勃起後嘅週長）就以法國男性居首，有13.63cm；但如果計整體體積，就由長度（17.59cm）及粗度（13.44cm）都係全球第三嘅厄瓜多爾男性為首，計算出黎嘅體積為252.8平方厘米。

整體而言，非洲男性嘅下體最偉壯，然後就係南美各國及澳洲、紐西蘭，隨後係歐美各國，然後先到亞洲。當中尤以東南亞各國最為「嬌小」。例如泰國就以9.43cm於長度一項敬陪末座，即使平均粗度有10.83cm排第10，但最終體積都只能以88cm平方厘米排包尾。若以體積黎計，厄瓜多爾男性係泰國男性嘅幾乎三倍！

數據：WorldPopulationReview、MenClub整理

其餘鄰居地區之中以台灣表現最好，12.5cm長加12.61cm粗，體積為158.2平方厘米居全球中前段（第66名）；日本男性以體積132.6平方厘米（長12.6cm、粗11.5cm）排全球106；中國男性長度雖然稍長（12.9cm）但粗度較遜色（11.14cm），所以只能以127.4平方厘米排全球116。

而如果以體積黎比較，新加坡（長11.16cm、粗11.29cm，體積113.2平方厘米）、南韓（長10.8cm、粗11.3cm、109.7平方厘米）、越南（長10.15cm、粗11.55cm、體積107.8平方厘米）、北韓（長9.6cm、粗11.86cm，體積107.5平方厘米）、菲律賓（長10.85cm、粗11.03cm，體積105平方厘米）等都比香港前。香港男性只能以11.19cm長、10.7cm粗，整體體積101.9平方厘米，於142國家中排135名。

資料來源：WorldPopulationReview