電影《門徒》入面劉德華一句「有人買咪有人賣囉」，道出任何產品或服務出現市場嘅原因，甚至嚴格上係出賣自己嘅「包養」市場亦唔例外。但問題係大家通常都只會覺得呢個社會有好多「賣」，但對於有幾多人「買」冇咩概念。近日有外媒就引用咗一個「Sugar Daddy」網站嘅數據，列出亞洲最多Sugar Daddy嘅地區及數字，其中香港就赫然上榜！

根據《Forbes》嘅定義，「Sugar Daddy」其實係一個「以金錢、禮物或體驗幫助年輕人，以換取對方陪伴，或雙方同意的任何安排的年長富裕人士」。粗略地舉個例子，就可以係「有錢老闆送包包畀個年輕女仔（男仔都得嘅），換取對方嘅肉體或感情」之類。而近日Seasis.stats就引用咗「Sugar Daddy」配對網站Seeking Arrangement嘅數據，整理出亞洲最多Sugar Daddy嘅十個地區。

排榜首嘅係印度，以33.8萬名Sugar Daddy大幅拋離第二名，擁有6萬Sugar Daddy嘅印尼。實際上即使將榜上二至十名嘅數字加埋，依然唔夠印度多。第三及第四名就為同樣有3.25萬Sugar Daddy嘅馬來西亞及日本。本港就以2.86萬及排第五，領先2.73萬名嘅台灣。榜上最後四名就為越南、南韓、斯里蘭卡及柬埔寨。

更有趣嘅係，如果你將上述數字除以當地總人口，以得出一個「Sugar Daddy人口佔比」，香港就會以近0.38%獨佔鰲頭，拋離第二名嘅台灣（0.11%）超過三倍、第四名嘅馬來西亞（0.95%）足足四倍。可以話香港先係「最多Sugar Daddy」嘅地方呀！

當然，大家亦需要留意「Seeking Arrangement」並非唯一一個同類型網站，亦大概唔會係當中最多人用嘅一個，所以上述數字字必真實反映各國嘅Sugar Daddy人數。