伴侶之間享受閨房之樂乃係天經地義嘅事，但其實做愛並非只係繁殖後代、又或到達高潮嘅必經過程，本身亦可以為段關係中帶來其他好處。近日一個美國研究就分析咗近2,800名美國成年人「與伴侶做愛時最享受啲咩」嘅回答，從中整理出六個主題。或者會令你將來嘅床上生活增添些少層次。

根據研究結果，於2,755名受訪者中，有超過900人認為「緊密性及親密性」係佢哋與伴侶做愛時最鍾意嘅元素，係六個主題中最常出現嘅。受訪者表示與伴侶做愛時會感到二人有情感上嘅連結，同時又能享受來自信任嘅人嘅安全感及溫暖。特別值得一提嘅係呢種感受未必要真係「做愛」先有，擁抱、或者於過程中感到外界慢慢消失就已經可以有咁嘅效果。同時，提供呢個答案嘅人來自各個性別與年齡層，顯示佢係一個非常廣泛嘅優點。

跟隨其後嘅就係有近900人提出嘅「進行特定嘅動作」，例如親吻、擁抱、各種性愛姿勢等等。有啲受訪者鍾意嘅一套「組合技」，但亦有人係只鍾意某一個獨立動作。研究指結果反映唔同人體驗快感的方式各有不同。

有約400人表示「感覺良好」就係佢哋最鍾意嘅部份。佢哋形容與伴侶嘅性愛係舒服嘅、滿足嘅，而且不僅限於身體反應層面，有唔少人亦有提出心理及情緒上嘅滿足。特別係過去有不快性經驗嘅人，就會特別重視目前嘅良好體驗。

第四個主題則是「愛與關懷」。回答此答案嘅受訪者認為「做愛」係表達「愛」嘅方式之一，能夠加深雙方嘅感情連結，並用上「被欣賞」、「被重視」、「被真正需要」等字眼。

第五個主題則係「令對方感到愉悅」。佢哋會為自己感夠為伴侶帶來快感而感到自豪、開心甚或感動。

而整個研究中，能夠為大家帶來最大啟發嘅，可能就係「高潮」只係排第六——冇錯，唔少男士認為嘅「做愛第一目標」，喺呢個研究結果中並唔係咁重要。所以大家將來與伴侶進行親密行為時，或者都可以將「到達高潮」嘅優先度調低，轉為享受個過程。

資料來源：What Are Americans’ Favorite Aspects of Partnered Sex? Findings From a U.S. Nationally Representative Survey