雖然話日本整體黎講都係一個治安良好嘅地方，但久唔久始終都會發生一啲罪案。而近日鹿兒島一間Family Mart（全家）嘅店員，就因為去年年尾於店內製服咗一名劫匪而獲得當地警察局頒發感謝狀，仲得到當地電視台訪問。不過就因為店員於訪問中透露嘅案發經過太荒誕，所以成為日本網絡熱話。

案發經過係咁嘅：去年12月22日，24歲嘅「松原陸空史」正於Family Mart嘅鹿兒島上之園町店到做兼職，當日仲要返夜更，所以到凌晨時份時成間鋪就得返佢一個人。就係呢個時候，佢發現有一名身穿黑色外套、戴住黑色帽、口罩，右手仲要拎住把刀，橫睇掂睇都一個賊嘅人行入鋪頭。

喺呢個緊要關頭，「松原陸空史」嘅第一反應唔係即刻報警、亦唔係隨手拎起啲嘢黎防身，而係問咗一句：「你係賊？」（強盗ですか?），好笑嘅係個賊又真係有禮貌咁答：「我係賊呀。」（強盗です）「松原陸空史」聽完之後仲心諗：「哦，原來真係賊。原來呢個世界真係有賊嘅！」

然後「松原陸空史」就於賊人指示下於收銀機拎咗20萬Yen現金出黎，仲留意到個賊冇拎到任何袋可以裝住啲錢，於是佢就好貼心咁問：「要袋嗎？」雖然連個賊都唔知點答佢，但佢仍然將啲錢裝落Family Mart膠袋交畀個賊。而一直相當配合而且有禮貌嘅「松原陸空史」，就於個賊轉身離開時，從後搶咗佢把刀，再將對方壓制在地，然後坐喺對方身上20分鐘直到警察到場接手。

正正就係最後製服賊人，所以「松原陸空史」近日就獲得當地警方頒發感謝狀，亦獲得當地電視台採訪講述當日嘅事發經過。不過報導出街之後，日本網民就紛紛吐糟「你係賊？」、「我係賊呀。」呢番對話非常奇妙，亦有人猜測「松原陸空史」就係一名「策士」，前面所有動作都係迷惑賊人，令佢放鬆警惕之用。

反正最後「松原陸空史」人無事，公司又冇唔見錢，佢又拎到感謝狀仲上埋電視，都算係大團員結局啦。