人體上最大嘅「性器官」其實唔係生殖器或性徵，而係大家嘅大腦，畢竟所有生理反應其實都係由大腦所控制。換言之比起「自慰時對手做緊啲咩」，「個腦諗緊啲咩」可能先係更重要嘅問題。而根據一個外國研究，有近七成人原來係諗緊前度，而且係有好充份而健康嘅理由。

據《New York Post》報導，美國男性成人玩具用品廠商「Ohdoki」早前公佈咗一個關於自慰習慣嘅調查，當中發現有76%男性以及59%女性於自慰時會諗住前度。雖然驟眼睇呢個習慣似乎唔太健康，道德上亦好似站唔住腳，但有兩性專家指呢個習慣其實有正當理由。

性治療師Kristie Overstreet曾於《The Everygirl》專欄中表示，對前度存有性幻想其實非常常見。如果你目前係單身，自慰時回憶起前度可以係「一種健康地回顧關係中美好一面的方式」；而如果你唔係單身，則可視之為「利用過去的關係來提升現在關係的方式」。

而臨床心理學家Pamela Stephenson Connolly則提出另一個解釋：於大部份文化中，回憶起與前度嘅性愛經驗都會被視為禁忌，但「打破禁忌」偏偏就係令人感到興奮。換言之諗起前度可能只係大家於自慰時增加樂趣嘅方法。

至於道德層面啦喎，古語有云「君子論跡不論心」——諗下啫！又冇真係付諸行動，冇咁大件事嘅！

資料來源：New York Post