歌都有得你唱：「小酒窩 長睫毛 是你最美的記號」，可見女性嘅眼睫毛對於其吸引力的確係有重要影響。而近日一個英國研究就計算出最具吸引力嘅睫毛長度，同時亦發現一個驚人現實：原來睫毛太長的話，其他人原來會覺得你嘅性觀念開放。

過去嘅相關研究已經證實，人們普遍認為中等長度嘅睫毛最具吸引力，但來自英國Plymouth大學嘅Farid Pazhoohi亦同時留意到市面上有大量標榜能大幅延長睫毛長度嘅美妝產品，似乎表示部份女性並非追求「夠長」嘅眼睫毛咁簡單，而係想透過眼睫毛表達其他訊息。

為咗驗證呢個假設，佢搵黎平均年齡為32歲嘅77名男、43名女共120名參加者，並要求佢哋對一系列由電腦生成，有住唔同睫毛長度嘅亞、非、印、歐裔女性面孔作健康、吸引度、以及對性嘅開放態度評分，以得知人係點樣理解不同眼睫毛長度。

研究結果首先發現，眼睫毛長度與健康、吸引力嘅關係呈一個反轉嘅U型，睫毛長度為眼睛寬度約1/3嘅健康及吸引力評分均為最高。換言之就係再次證實中等長度嘅眼睫毛最靚。但研究亦同時發現，雖然長睫毛嘅吸引力及健康評分都較低，但其性觀念開放程度評分反而係最高。換言之長睫毛可能會被人解讀成對短期關係呈開放態度嘅訊息。

Farid Pazhoohi總結指，女性刻意整長睫毛可能係一種潛在嘅生殖策略，以吸引更多繁殖嘅機會。同時亦揭示吸引力與性開放程度係可以存在分岐。

資料來源：Long Lashes, Mixed Signals: Investigating the Effect of Eyelash Length on Perceived Health, Attractiveness, and Sexual Receptivity