早幾年疫情時大家被逼在家工作（Work From Home, WFH），然後就發現原來唔使返Office係一件非常舒服嘅事。可惜嘅係自從疫情過去後，好多企業都開始滅少員工在家工作嘅時間，甚至直接要求員工必須每日於辦公室現身。而且唔好以為取消WFH只係令打工仔唔開心咁簡單呀，近日史丹福大學就有個研究，指出WFH有助夫婦升生育率。換言之要打工仔返工，好可能會加劇發達國家少子化嘅問題。

據《New York Post》報導，史丹福大學經濟學家Nicholas Bloom早前公佈咗一個關於WFH與生育率之間關係嘅研究。研究分析咗38個國家嘅打工仔上班模式以及其生育率，發現如果夫妻雙方都能夠WFH或遙距工作的話，哪怕一個星期只得一日，其生育率都會比起至少是但一方要返足5日工嘅夫婦明顯地高。

Nicholas Bloom更指如果有50%美國人可以一個星期WFH一日的話，每年美國會多10萬個嬰兒出生。換言之WFH似乎能夠減緩發達國家日益嚴竣嘅人口老化、出生率低問題，長遠黎講更可能帶來1000億美金嘅經濟效益。

可惜嘅係，呢份報告似乎黎得有啲遲。上月中《Wall Street Journal》先報導過，指Microsoft、Paramount以及NBCUniverse等大企業近來都減少員工WFH嘅時間，其中Paramount更規定員工必須日日返Office露面。值得一提嘅係，經常將生育率低掛喺口邊、仲身體力行係咁（同唔同人）生仔嘅Elon Musk，其實係最反對WFH嘅人之一。唔知佢睇到呢份報告後，會唔會改變佢對WFH嘅睇法呢？

資料來源：New York Post、Wall Street Journal