一般人談戀愛，大都會跟隨「拍拖、同居、結婚」呢幾個步驟。不過通脹同生活成本高企，就真係改寫現代人，特別係年輕人嘅拍拖模式。美國 《DatingNews.com》與《Kinsey Institute》最新研究指出，43% 嘅美國年輕單身人士近來會減少約會，37%會縮減拍拖開支，而33%直言經濟環境令佢哋對投入感情更猶疑。

圖片：Pixabay

因為出街睇戲食飯變貴而唔約會、唔拍拖、甚至唔開始一段關係，聽落好似好合理。但其實物價上漲仲可能對年輕人有另一個方向嘅影響：一旦拍拖就火速同居甚或結婚。同一份研究顯示，23% 嘅單身受訪者會為提早同居，而Z世代嘅比例更去到38%；26% Z世代亦表示會提早結婚。兩者嘅目的都唔係因為有幾愛對方、有幾想同對方日見夜見，而係希望節省租金、水電等日常開支。

值得一提嘅係，Z世代中男性想提早同居（28.6%）或結婚（18.8%）嘅比例，比女性為高（18.8%及13.7%）。換言之男性面對嘅經濟壓力依然較女性大。

圖片：Pixabay

呢種「為成本而同居、結婚」嘅方法或者有經濟用途，不過研究團隊都提醒，呢種功利諗法展遠黎講未必健康。Kinsey Institute 的研究人員就指出，當感情未經充分磨合就同居或結婚，往往更容易出現生活習慣不合、責任分配不均等現實衝擊。專家建議，年輕人即使因財務考量提早同居，也應該明確溝通生活安排與期望，否則一旦出現矛盾，經濟綁定反而會令關係更難抽身。

資料來源：New York Post、DatingNews.com