語言既係我哋表達想法嘅工具，同時語言嘅選擇亦會影響我哋對於事物嘅態度及想法。好似近日一個歐洲研究就發現，女性用咩字眼去稱呼自己嘅私處，原來係同佢哋對自己嘅身體形象、性生活幸福程度有關。簡單黎講，就係會用幼稚字眼（中文嘅例子如「妹妹」之類）稱呼自己私處嘅女性，對於自己嘅身體形象更為負面，同時性幸福度亦會較低。

話說一群來自德國、英國及以色列嘅心理學家，試圖透過分析女性稱呼自己私處嘅用字黎探討女性嘅態度與行為，於是佢哋於美國搵黎457位女性，並紀錄佢哋於日常情境、以及性愛情境中會用咩字眼黎稱呼私處。佢哋將受訪者嘅答案分成九大類，其中較為重要嘅有「學術用字」（例如陰道、外陰）、「粗魯用字」（英文Pussy，中文大概就係粗口啦）、「幼稚用字」（如妹妹）以及「代指用字」（即「下面」、「嗰到」之類）。同時受訪者亦需要完成一系列問卷，以量度佢哋對於自己私處嘅形象、整體性幸福度、高潮頻率、對口交嘅睇法等。事後研究團體再將不同稱呼與問卷結果作對比，睇下兩者之間有咩關連。

圖片：ImageFX

結果發現，於日常情境中，有75%女性都會用「學術用字」黎稱呼自己私處，而有15%嘅人則會用「幼稚用字」或「代指用字」。而當中用「幼稚用字」嘅人，比起其他組別更傾向對自己私處有負面形象，結果就係佢哋唔鍾意被口交、更傾向做外陰整形手術以及使用陰部清潔液等，簡單黎講就即係佢哋唔鍾意自己私處。

另一邊廂，研究亦發現於性愛情境中，有45%女性都會用「粗魯用字」，而呢群人嘅性愛幸運度、高潮頻率，以及願意被口交嘅程度都比其他組別更高。

雖然研究本身就唔包括搵出呢啲現象嘅原因，但據估其實都係同女性嘅自我形象有關：於日常情境中用「幼稚用字」嘅女性相對地唔太鍾意自己嘅私處，不安之下自然就更加保守，繼而影響性幸福度；而於性愛情境中用「粗魯用字」嘅女性就相反，更為開放地追求快感，自然就更加滿足啦。

資料來源：Vagina, Pussy, Vulva, Vag: Women's Names for Their Genitals are Differentially Associated with Sexual and Health Outcomes