可樂百事有冇雪碧？ Rolex GMT Master的別名

文：MenClub 魏文青　　
POSTED ON 24 Apr 2019

早前Basel 2019 勞力士就更新咗「Batman」黑藍圈GMT Master II，上年又更新咗最標誌性嘅「百事」藍紅圈，可見此系列深受買家歡迎。而講開GMT系列嘅花名，大多都係來源自汽水，如果要你為呢個系列添個新成員你又會揀啲咩？

1954年勞力士以 Ref.6202為藍本設計出第一隻GMT Master(Ref.6542)，最初為泛美航空(Pam-Am)嘅機師及乘服員設計，藍紅雙色圈係為咗方便作跨時區飛行時可同時查看兩個時區，亦因為呢隻配色而被暱稱為「Pepsi」，香港人稱「百事圈」。值得一提係第一隻Ref.6542 又稱「Pussy Galore」，因為當年電影《鐵金剛大戰金手指》中有個叫Pussy Galore嘅角色戴過呢隻錶。

去到1983年GMT Master 進代成Master II，第一隻Ref. 16760 英文暱稱「Fat Lady」，皆因佢錶殼較為厚重；英文同時又稱為「Sophia Loren」亦即著名意大利演員蘇菲亞．羅蘭——而Sophia Loren係出名身材好嘅。Ref.16760 亦係GMT系列第一次使用黑紅圈，於是又稱「Coke」、「可樂圈」。

回到GMT Master 尾期，Ref.16750曾經推出過幾個變化形，其中16753係金加鋼，再配上啡色錶圈就成為咗有名嘅「Root Beer」，人稱「沙士圈」。勞力士於Basel 2018亦曾經更新「沙士圈」，推出126711 CHNR，有全玫瑰金同半金款。由於用上貴金屬，所以價錢較高，相對亦比其他GMT冷門啲。

2013年勞力士再為GMT系列添上新色，上黑下藍嘅116710BLNR，係2005年GMT系列用上陶瓷圈後第一次出現雙色錶圈，亦係首次出現黑藍配色，人稱「Batman」。由於陶瓷圈嘅製作難度，當年大家一直以為GMT系列雙色不再，所以當勞力士拎出雙色陶瓷圈時確實係一個技術飛躍，不過當時啲人就比較期待傳統嘅「百事」、「可樂」，勞力士稱用黑藍係因為藍色代表白天比較合適——結果下年就順應民意出咗隻白金陶瓷圈「百事」Ref.116719 BLRO。

而繼2013年後，雖然GMT Master II多有更新，但就已經冇新色再推出。如果有嘅話大家又想係咩色？既然「百事」、「可樂」、「沙士」都有，唔啱整多隻「雪碧」？

各位冷靜啲，唔使太興奮呀下，因為呢隻當然唔係真錶！卻說外國錶網「Hodinkee」嘅其中一位高層有個叫Zahid Ali嘅八歲仔，或者係因為從小就耳濡目染，所以呢位小朋友畫畫時竟然畫咗隻黃綠圈GMT出黎，佢爸爸再以其為藍本畫出咗呢隻「雪碧」。靚就真係幾靚，而且數數手指又差唔多係時間GMT出新色，但黃綠咁跳脫嘅顏色似乎唔多符合勞力士嘅作風，所以大家都係睇下開心下啦。