TUDOR最新推出嘅TUDOR Royal源品牌於上世紀50年代推出嘅同名作品，以兼具運動氣息及時尚風範，高質但又唔貴嘅中庸之道見稱。但你問我，我就會話TUDOR Royal係考驗緊大家嘅選擇能力，因為佢有4個Size、5款錶面、再分錶面有石同冇石、錶殼有金定冇金，剩埋即係有幾多款？望住個表我都覺得眼花瞭亂呀！

41mm 黑色太陽光線面，18ct金外圈、錶冠及錶帶

基本上，TUDOR Royal係一隻錶殼、五節錶帶同上鍊錶冠都用上316L精鋼，再加自動上鍊機械機芯嘅瑞士腕錶。複雜係複雜在佢有41mm、38mm、34mm、28mm4個Size，又有黑、銀、香檳、藍四色大陽光線效果錶面，再可以選擇將錶面上除3、6、9、12點外嘅時標換上鑽石，然後亦可以選擇18ct黃金錶冠及錶帶。值得留意嘅係4個大小分別都用上三種錶芯，但都係大三針，3點位置有日期窗、38小時動力儲存、100米防水，唯一係41mm款使用嘅2834型於12點設有星期窗。

而除咗上述4款錶面，更有只限38mm及34mm大小嘅白色珍珠母再鑲鑽款。據官網顯示，TUDOR Royal前前後後總共有超過50款，有興趣嘅話我建議大家去返TUDOR官網慢慢揀。