潮流興環保，各個領域嘅不同品牌都以環保之名推出新服務或新產品——當然都有啲品牌係拎走你啲嘢就當係環保嘅——反正環保就係一個提升品牌形象嘅好方法啦。不過有啲品牌係扮環保，有啲就係真環保，好似日本嘅Ethical Spirits咁，就有出過以釀製清酒時剩低嘅「酒粕」重製而成嘅「LAST」氈酒。最新嘅搞作，更加為Budweiser解決一大問題。

卻說因為疫情影響，日本經濟啤酒銷量比上年同期跳咗52%，亦令到日本最好賣啤酒之一嘅Budweiser有近八萬杯到期賣唔出要報廢。但就咁掉咗佢又好似好浪費，於是佢哋就搵咗Ethical Spirits幫手，而Ethical Spirits又拉埋清酒釀造廠「月桂冠」一齊，將呢八萬支啤酒再次蒸餾，並加入杜松子、啤酒花及檸檬皮、再蒸餾、再加入杜松子，山毛櫸、肉桂、三溫糖等，製作成口勁強烈嘅「Revive」氈酒。

「Revive」每支為360ml、售價5,000Yen一支 (約$HK370)。如果你都想試下以Budweiser製作嘅氈酒，又或者想支持環保 (提升形象，記得冇？)，就可以留意Ethical Spirits嘅官網啦。