喺腕錶界，拎經典錶款出復刻版從來都唔係啲咩新鮮事，不過話就話係「復刻」，但好多「復刻版」其實都只係個樣望落似經典款，實際上就裏裏外外都做咗好多變化，對於追求原汁原味嘅人黎講總係差少少。而ZENITH「Chronomaster Revival」系列推出嘅呢隻復刻版A385就唔同啦，佢真係裏裏外外都「抄足」當年隻成名作架！

圖片：ZENITH

A385最早於1969年推出，屬「ZENITH El Primero」系列嘅三隻作品之一。「ZENITH El Primero」就當時世上第一款高振頻自動計時腕錶，代表造錶工藝嘅一大突破，乃是ZENITH的成名作之一。而A385同時更係首款用上「煙燻色」錶盤嘅腕錶，令其地位更加特殊。

黎到「Chronomaster Revival」系列，ZENITH利用當年嘅設計藍圖及生產設計圖，再加上「逆向工程 (Reverse Engineering)」反推出A385每個零件嘅製作方法，重製錶殼上每個零件，就連個煙燻錶盤嘅色調及漸變效果都儘量跟足原作，再加上多得製錶師Charles Vermot於1975年偷偷保存El Primero機芯嘅製造工具及生產流程，令El Primero機芯得於1984年重見天日，換言之呢隻「Chronomaster Revival」裏裏外外都幾乎同原版一樣。

圖片：ZENITH

唯二唔同之處，係新版用上弧形藍寶石水晶鏡面代替當年嘅亞加士膠，底蓋亦由密封式換成透明。另外亦有兩款錶帶可供選擇，一就係早期El Primero 「Gay Freres」錶帶嘅現代版本，「Ladder」精鋼錶帶，另一款就係淺棕色小牛皮錶帶。