當年Apple Watch推出之時，曾經有人預言會對傳統瑞士機械錶帶來巨大衝擊，數年過去，與其話智能手錶衝擊機械腕錶，不如話為傳統腕錶帶來新靈感。就好似H.MOSER & CIE於2016年推出嘅Swiss Alp Watch，睇個樣都知佢個靈感來自啲咩。最新推出嘅Final Update更加係進一步玩盡智能手錶嘅概念。

圖片：H.MOSER & CIE

Swiss Alp Watch Final Update放棄前作錶盤上會有嘅品牌標誌，用上目前最黑人造物質「Vantablack」錶盤，深沉的黑色有如沉睡中嘅智能錶螢幕，6點位置嘅小秒針盤更加係仿照「Loading」圖像而設。據知此設計係由一名品牌Fans推出，就連品牌執行長Edouard Meylan都直言腕錶「既幽默又透露一絲挑釁意味」。

圖片：H.MOSER & CIE

雖然外貌似足智能手錶，但Final Update嘅黑色DLC塗層精鋼錶殼中乃係貨真價實的 HMC 324手動上鏈自製機芯，提供最少96小時動力儲存，亦能透過透明藍寶石水晶底蓋欣賞機芯運作。配上手工縫製黑色鱷魚皮錶帶及鐫刻Moser標誌的黑色DLC不鏽鋼針扣。