為慶祝Jaguar經典跑車E-type面世60週年，英國奢華鐘錶品牌Bremont特別推出獨量版禮盒。每盒包括一隻綠色或灰色計時腕錶，以及Bremont首次推出嘅賽車計時器。

講到Jaguar經典跑車，絕對唔少得1961年推出嘅E-type，265匹馬力加上3.8升直列六缸引擎，最高時速達至251km/h，但價格只需當時嘅Aston Martin或Ferrari一半。於車展上首次亮相隨即成為全場焦點，更被法拉利創辦人Enzo Ferrari譽為「史上最優美的車款」。

為咗興祝呢部別具意義嘅經典跑車誕生60週年，英國奢華鐘錶品牌Bremont特別推出限量版禮盒，入面包括一隻綠色或灰色計時腕錶（無錯！買錶都要抽盲盒），以及Bremont首次推出嘅賽車計時器。

綠/灰兩色各限量60隻嘅Jaguar E-type 43mm腕錶，設計靈感嚟自E-tpye跑車，黑色錶盤取材自E-tpye嘅儀表板，倒角時針及分針則與跑車轉速錶指針設計相同，而錶圈及錶帶顏色則嚟自復刻版E-type「Flat Out Grey」及「Drop Everything Green」。

禮盒內仲收藏咗Bremont首個賽車計時器，由測速碼錶及秒錶兩個儀表組成，錶冠刻有Dunlop賽車輪胎的花紋，既可擺放喺書枱，亦可成為汽車內裝飾。