最近日本BANDAI NAMCO同G-SHOCK合出，推出《機動戰士高達 馬沙之反擊》紀念手錶「G-SHOCK 阿寶·尼爾」，將主角阿寶嘅駕駛服融入G-SHOCK經典錶款「DW-6900」，於官方App「GUNDAM FAN CLUB」限量發售。

由官方營運嘅「GUNDAM FAN CLUB（ガンダムファンクラブ）」係一個高達粉絲App，一般會員每個月課金600日圓（約$42港幣）就可以盡情收睇高達動畫、OVA、劇場動畫，以及最新周邊商品介紹等等。不過由於今次呢隻「G-SHOCK 阿寶·尼爾」只開放畀Premium會員（年費10,000日圓，約$705港幣）購買，所以有興趣嘅朋友就要課多啲金升級會員，否則就要自己諗辦法啦！

「G-SHOCK 阿寶·尼爾」設計靈感嚟自《馬沙之反擊》阿寶嘅駕駛服造型，以白色為底色並加上紅線條及文字點綴，除咗錶面上印有阿寶個人標記「A」，當打開LED燈時，螢幕更會出現一個以A字為原型嘅機體圖案。另外，背面嘅金屬錶蓋亦刻有地球聯邦軍隆巴納（Lound Bell）部隊LOGO，表達出《馬沙之反擊》嘅世界觀。

售價為22,000日圓（約$1552港幣），7月31時起開放預購（只限Premium會員），預計10月上旬發貨。