日前美斯身穿「Ici c'est Paris（這是巴黎）」T-Shirt抵達法國，吸引數百名球迷到場接機，美斯眼見咁多支持者都好「識做」，一到步就走到機場窗口除低口罩向路上球迷揮手，有眼利嘅網友就發現美斯手上戴住一隻Rolex，並唔係Daytona、GMT等熱炒款式，而係Yacht-Master。

Rolex Yacht-Master系列最早誕生於1992年，專為航海家及帆船運動員而設，同時亦係Rolex首次採用Oysterflex橡膠錶帶嘅系列，號稱錶帶能夠喺各種環境之下都依然持久耐用。今美斯所戴嘅「126655 Oyster Perpetual Yacht-Master 40」，以18ct玫瑰金為主要材質，配備醇黑色錶面以及啞黑色Cerachrom陶質字圈，啞面磨砂嘅外圈令磨光數字同刻度特別鮮明，奢華得嚟又相當低調，定價為$213,000港幣。

雖然相比起Daytona、GMT Master、Submariner系列，Yacht-Master並唔係咩大熱炒賣款式，但能夠被美斯睇中，而且仲要喺一個咁重要嘅場合佩戴，相信一定有佢嘅迷人之處。不過無論炒唔炒款都好，以美斯嘅身價（周薪700萬港元），佢入手126655應該同大家平時去買模型嘅感覺差唔多，而且佢同Rolex又冇合作關係，可以睇得出佢真係鍾意呢隻錶。