早兩日喺網上見到篇嘢，話過去一年如果你炒錶，回報比起你去炒股更加高。事實上對腕錶有興奮嘅朋友應該都知，近年部份品牌嘅部份型號的確越炒越有，如果講舊錶價格更可以非常驚人。例如呢隻1957年推出嘅OMEGA Speedmaster，早前就於一個拍賣會上以311.5萬瑞士法郎 (即約HK$2640萬) 成交，成為史上最貴OMEGA腕錶。

圖片：phillips.com

此次成交嘅Speedmaster編號為CK2915-1，整個CK2915都係代表OMEGA於1957-1959年間生產嘅首批Speedmaster，CK2915-1更係首批中嘅首批，由於產量少，年代又久遠，能夠成功「存活」到此嘅已經非常罕有，故被腕錶收藏家們形容為「聖杯」。

Speedmaster CK2915係史上第一款將測速計刻度放喺表圈，而非錶面上嘅計時錶，而且與往後嘅CK2915-3以及CK2998嘅「黑圈白字」唔同，CK2915-1及CK2915-2嘅錶圈都係「鋼圈刻字」；整個CK2915系列亦用上「闊箭」指針，成為其特色之一。底蓋內嘅就係經典嘅OMEGA 321錶芯，其堅固與準確一直備受讚賞，原裝版早於五十幾年前就停用，本身就已經夠珍貴，更遑論搭配於一隻CK2915-1之中。

圖片：phillips.com

以上都係CK2915-1貴嘅原因，但唔係「呢隻CK2915-1貴到咁」嘅原因。刷新成交價嘅呢隻CK2915-1，經過年月洗刷後其黑色錶面已經變成均勻嘅牛奶朱古力色，時標及指針上嘅夜光物料亦養化成類似金色嘅狀態，正正就係呢種可遇不可求嘅變化，令到呢隻原本預計成交價僅為8-10萬瑞士法郎嘅腕錶，變成史上最貴嘅OMEGA。